Shugaban Tsagerun Inyamurai Ya Roki Magoya Bayansa Da Martaba Doka

Shugaban Kungiyar Rajin Neman Kafa Ƙasar Biafra (IPOB), Nnamdi Kanu, ya roƙi magoya bayan sa cewa su yi wa Allah kada su tada buyagi a harabar Babbar Kotun Tarayya, Abuja, idan an je shari’ar sa a mako mai zuwa.

A ranar 18 Ga Janairu ce Babbar Mai Shari’a Binta Nyako za ta yanke hukuncin ko Kanu na da gaskiya ko a ci gaba da shari’a.

Yayin da ake shirin zaman kotun, lauyan Kanu Ifeanyi Ejiofor ya same shi a Hedikwatar SSS inda ya ke tsare a Abuja, su ka tattauna yadda zaman kotun zai kasance.

Bayan dawowar sa daga wurin Kanu, lauya Ejiofor ya sanar cewa Kanu ya na gaishe da ɗimbin magoya bayan sa na cikin gida da na sauran ƙasashen duniya.

Sai dai kuma ya yi roƙon cewa kada su tada buyagi a harabar Babbar Kotun Tarayya a ranar zaman kotun.

“Kanu ya ce ya na roƙon magoya bayan sa su bi doka, su natsu, su nuna ɗa’a. Kuma kada su tada hankali ko tarzoma, hauragiya ko buyagi.”

Ejiofor dai ya ce ya na ji a jikin sa cewa Kanu, wanda ya riƙa kira da suna Onyendu, zai yi nasara a ranar.

Labarai Makamanta