Satar Dalibai: Ganduje Ya Bi Sahu Wajen Kulle Makarantu

Gwamnatin jihar Kano ƙarƙashin jagorancin Gwamnan jihar Abdullahi Umar Ganduje ta sanar da rufe makarantun kwana 10 a sassan jihar nan take biyo bayan sace yan matan makarantar GGSS Jangebe a jihar Zamfara da ‘ yan bindiga suka yi.

Kwamishinan Ilimi na jihar Kano Muhammad Kiru ya ce gwamnatin ta cimma matsayin ne bayan nazari da bita kan abubuwan da ke faruwa a jihohin da ke makawabtaka da ita inda ake sace ɗaruruwan dalibai.

A cewarsa, rashin tsaron ne ya tilastawa gwamnatin jihar daukar matakin domin kare lafiya yaran. Ya ce iyaye da masu kulawa da yara su tafi su kwashe yaransu daga makarantun, nan gaba gwamnati za ta sanar da ranar da za a bude makarantun don cigaba da karatu.

Ya lissafa makarantun da abin ya shafa kamar haka: Maitama Sule Science College, Gaya; Boarding Secondary School, Ajingi; Girls Secondary Schools a Sumaila, Gezawa da Jogana, Kachako da wata a Unguwar Gyartai a Kunchi da kuma Girls Secondary School, Albasu. Sauran sun hada da Makarantar Sakandare ta maza da ke Maiyaki da Unity College a Karaye.

Labarai Makamanta