Najeriya Da Amurka Za Su Haɗa Ƙarfi Wajen Yakar ‘Yan Ta’adda

Ƙasar Amurka ta bayyana goyon bayan ta akan yaƙi da ta’addanci da ‘yan ta’adda da Najeriya ke yi, sannan ta yi alkawarin haɗa karfi da Najeriya wajen kawo karshen ‘yan ta’adda dake addabar kasar musamman yankin Arewacin kasar.

Amurka ta bayyana hakan ne a yayin ganawa da manyan hafsoshin tsaron Najeriya da kwamandan Sojin Amurka mai kula da nahiyar Afirka Janar Stephen Townsend ya yi a birnin tarayya Abuja.

Kwamandan Sojin Amurka a yankin Afirka, Janar Stephen Townsend ya ce za a kawo jiragen nan guda goma sha biyu na yaki kirar A-29 Super Tucano da Najeriya ta saya daga Amurka a cikin wannan shekarar, a ƙoƙarin da ƙasar ke yi na yaƙi da ‘yan ta’adda.

Mista Townsend ya bayyana hakan ne a wata sanarwa bayan ya kammala ziyarar kwanaki uku na Yammacin Afirka tare da tsayawa a Najeriya, ranar Juma’a.

“A matsayin kawaye na kud da kud, Amurka da Najeriya sun yi aiki don tabbatar da alakar hadin gwiwa ta ci gaba da bunkasa don kokari da kuma sadaukar da kai.

“Najeriya ta sayi jirgin yaki mai saukar ungulu guda 12 kirar A-29 Super Tucano, wanda za a kawo nan gaba a wannan shekarar,” in ji shi.

Ya ce Kwamitin Afirka na sojin Amurka zai yi iya kokarinsa don inganta ginshikin hadin gwiwar tsaro, ta yadda ‘yan Najeriya za su more rayuwa mai aminci da suka cancanta.

Townsend ya gana da Shugaban Ma’aikatan Najeriyar, Ibrahim Gambari, da mai ba Shugaban kasa Shawara kan Harkokin Tsaro, Babagana Monguno, inda suka tattauna kan al’amuran tsaro na yankin.

Kuma sun nuna godiyar rundunar game da taimakon da aka bayar yayin ayyukan ceton wadanda aka yi garkuwa da su a bara. “Lokacin da muka nemi taimakon su, gwamnatin Najeriya ta amsa kiran.

Manufarmu ta dawo da wadanda aka yi garkuwa da su a watan Oktoba ba zai yiwu ba tare da goyon bayansu ba. “Nan da nan suka ba da taimako wanda ya taimaka wa sojojin Amurka don ceton rayuwar Ba’amurke. Wannan babban misali ne na hadin gwiwarmu da Najeriya ”.

Mista Townsend ya kuma gana da manyan hafsoshin soja, ciki har da Ministan Tsaro, Bashir Magashi da Babban hafsan hafsoshin tsaro, Janar Leo Irabor, don tattaunawa kan ci gaba da hadin kai a yankin da kuma inganta tsaro a cikin teku da rage barazana ga kasar.

Najeriya babbar kawa ce ga kawar da kungiyoyin masu tsattsauran ra’ayi a duk fadin Tafkin Chadi. “Shugabannin Najeriya sun fahimci mahimmancin tsarin hadin gwiwa don tabbatar da kwanciyar hankali a Afirka ta Yamma da kuma hadin gwiwa a bangarorin da suka shafi moriyar juna,”.

Hakanan a cikin sanarwar, Jakadiya Linda Thomas-Greenfield daga Ofishin Jakadancin Amurka a Majalisar Dinkin Duniya ta ce Amurka ta yi Allah wadai da sace ‘yan mata sama da 300 daga Makarantar Sakandaren ‘Yan Mata ta Gwamnati da ke Jangebe a Najeriya.

Labarai Makamanta