Kaduna: Kungiyar ‘Yan Jarida Za Ta Kaurace Wa Taron PDP

Kungiyar ‘yan Jarida ta ƙasa reshen Jihar Kaduna ta yi kira da babbar murya ga jam’iyyar PDP da ta gargadi jami’in yaɗa labarai na jam’iyyar a jihar Kaduna Katoh Alberah a ƙoƙarin da yake yi na raba kawunan ‘yan Jarida a jihar.

Kiran ya biyo bayan matakin da jami’in yaɗa labaran ya ɗauka na zaɓar wasu ‘yan Jarida a matsayin wadanda za su yi rahoto a zaɓen fidda gwani na jam’iyyar da ke gudana a Kaduna da yin watsi da wasu ‘yan Jaridar.

Kungiyar ta bayyana hakan ne a cikin wata sanarwa da suka fitar ranar Laraba a Kaduna a taron karshen wata da kungiyar da ya gudana a Kaduna.

A cikin takardar bayan taron wadda ta samu sanya hannun Usman Sani ta bayyana matakin da Mista Katoh Alberah ke dauka a matsayin wani yunkuri na haifar da rarrabuwar kawuna tsakanin ‘yan Jarida a jihar.

Sanarwar ta bayyana jami’in yaɗa labaran a matsayin Mutum mai ɗagawa da nuna girman kai ga ‘yan Jarida a jihar.

Kungiyar ta shawarci ‘yan Jarida a jihar da su cigaba da gudanar da ayyukan su cikin tsari da haɗin kai da kauce wa dukkanin wani abu da zai kawo saɓani a tsakanin su.

“Matuƙar Mista Katoh Alberah zai cigaba da yin hakan babu shakka Ƙungiyar ba ta da wani zaɓi wanda ya wuce ta ƙauracewa ɗaukan labaran jam’iyyar PDP a Jihar.

Daga ƙarshe Ƙungiyar ta yi Allah wadai da cin zarafin da wasu jami’an tsaro suka yi wa ‘yan Jarida a yayin taron da Jam’iyyar PDP ta gudanar kwanan nan.

Labarai Makamanta