Borno: Hukumar Kula Da Filayen Jiragen Sama Ta Karyata Labarin Tashin Bam

Rahotanni daga Maiduguri babban birnin Jihar Borno na bayyana cewar Hukumar kula da filayen tashi da saukar jiragen sama ta Najeriya (FAAN) ta musanta rahotannin tashin bam a filin jirgin saman Maiduguri.

Wata sanarwa fa kakakin Hukumar FAAN, Henrietta Yakubu ya fitar, ta ce: “Ba a kai wa filin jirgin saman hari ba, kuma ba a kai hari ko wanne bangarensa ba.”

“Game da rahoton da aka samu ta yanar gizo da ke cewa bam ya tashi a filin jirgi na Maiduguri da ake zargin mayakan Boko Haram ne suka shirya, hukumar ta FAAN ta sanar da fasinjoji da sauran jama’a cewa babu wani fashewa, ko kutse a filin jirgin Maiduguri.”

Tashar talabijin ta Channels ta rawaito cewa an samu fashewar wani abu da sanyin safiyar ranar Asabar a wani gida da ke Maiduguri babban birnin jihar Borno. Rahoton na Channels ya ce gidan yana kan hanyar Maiduguri zuwa Damaturu.

Rahoton ya kara da cewa fashewar ta afku a kasa da mita 100 da wani sansanin tubabbun ‘yan Boko Haram, inda gidaje kusan 12 suka lalace.

A Maiduguri dai an samu raguwar hare-haren ‘yan tada kayar baya a ‘yan kwanakin nan.

Labarai Makamanta